Puisi-puisi Christofel W. B. Manoppo

LAVENDER

Kita nda tako bajalang malang

Lantaran ini kota kita pe kampung

Kita lei nda tako felem setang - setang

Lantaran so basar, so tau itu samua cuma da bekeng - bekeng

Pas da bauni TV sandiri

Blum tiki tenga malang, di muka jalang masi ja lewat orang

Bulu - bulu panta leher kage - kage badiri

Dapa ciong opa - opa pe minya wangi

31/3/2K10

Ch. W. B

 PERTANDA (On March 26, 2011)

 Kalawat

 masi pagi skali

 Charlie pe mama babilang pa dia

 "Ngana nda dengar? Ada dua doyot dekat sini tadi

 basuara rupa gelisah skali"...

 Manado

 masi lei pagi - pagi

 kita tabangon dengan perasaan nda enak

 mimpi tadi malam lari mengungsi dari tsunami

 pas abis evakuasi dapa dengar ada orang bataria,

 "Adoh kita pe mama tatinggal!"

kita buka hape

muncul sms dari Charlie, dapa berita dari tamang

"Fredy pe mama so berpulang, torang mo ka Sonder sabantar"

30/3/2K11

Ch. W. B

TABEA

cewe stel span - span

biar tu muka nyanda maso standar

deng kaca mata hitam basar

di muka Multi Mart dekat 45 masi sore trang

dia balenggang di sei mikro da tunggu panumpang

kong sopir batogor pa dia,

"MALAAM!"

9/2/2K11

Ch. W. B

SERAGAM

waktu masi SD

pake seragam

di SMP

pake lei seragam

di SMA

masi lei pake seragam

mujur kalu kuliah

nyanda perlu pake seragam

maar kalu so karja

bole jadi perlu seragam

Translated version: Aug. 2K10

Ch. W. B

(Christofel W.B. Manoppo, biasa disapa Billy, penyair dan giat di Mawale Cultural Center)